羅馬再掃免費兵　曉姆斯做體測準備加盟

意甲夏天轉會窗關閉，不過羅馬仍然好忙碌，周二(3日)宣布將英格蘭中堅基斯史摩寧賣去沙特球會艾費哈，同時宣布西班牙守將馬里奧靴莫素以自由身加盟，權威記者Fabrizio Romano更爆料，德國中堅曉姆斯亦已飛去意大利做體測，完成後亦會同羅馬簽約。

35歲嘅曉姆斯夏天同多蒙特約滿回復自由身，一直係球壇搶手貨，據報韋斯咸、白禮頓、馬略卡、博洛尼亞等球會都有向佢開出聘約，不過曉姆斯最終選手加盟羅馬，依家已經飛去羅馬做體測，將會同呢支意甲老牌勁旅簽約1年。

羅馬喺今季意甲開局唔太順利，3場聯賽只得2和1負，日前將基斯史摩寧賣畀艾費哈後，接連喺自由身市場補充馬里奧靴莫素同曉姆斯兩位猛將，有望幫助球隊重返正軌。