朗奴高文嬲貝雲積去沙特：佢嘅荷蘭生涯已完

荷蘭球星貝雲積日前宣布離開阿積士，以2,100萬歐元轉會費加盟沙特勁旅伊蒂哈德，不過呢單轉會就令荷蘭主帥朗奴高文火滾，佢周三(4日)公開批評貝雲積「為錢棄前途」，表明該26歲翼鋒嘅國家隊生涯已經完結。

朗奴高文喺荷蘭記者會表示：「貝雲積嘅國家隊生涯基本上已經完結，我覺得當你只得26歲，你嘅目標應該係競技層面而唔係經濟層面，佢留喺阿積士待遇都唔會差。每個人有自己選擇，我就一定唔會行佢呢條路，佢事前冇問過我意見，我諗佢都知我會講乜。」

不過，荷蘭另一國腳韋拿杜姆之前加盟沙特球會伊蒂法克，仍然有份入選荷蘭夏天歐國盃大軍，朗奴高文就否認「雙重標準」：「韋拿杜姆喺巴黎聖日耳門遇上問題，去沙特係唯一比賽機會，而且年紀都唔同，唔可以同貝雲積做比較。」