艾雲東尼人工暴漲10倍　仲多過哈利卡尼

賓福特前鋒艾雲東尼日前落實加盟沙特阿拉伯豪門吉達艾阿里，根據「轉會權威」記者羅曼諾(Fabrizio Romano)爆料，呢位28歲英格蘭國腳獲得稅後40萬周薪，加上獎金，總周薪可達到50萬鎊(約510萬港元)，等於效力賓福特時期嘅10倍，甚至多過英格蘭首席射手哈利卡尼。

艾雲東尼今夏獲得車路士、熱刺、阿仙奴、曼聯等大球會垂青，但最終加盟吉達艾阿里，歸根究底都係錢作怪，因為呢支沙特豪門開出4,000萬鎊轉會費，並向艾雲東尼提供一份4年合約，稅後固定周薪達40萬鎊，仲有獎金，總周薪可達50萬鎊。

根據英國稅制，英超球員要獲得稅後50萬鎊周薪，等於球會需要支付稅前100萬鎊周薪，相信英超球會冇可能提供呢種天價合約。

吉達艾阿里隊內有多前英超球員，包括效力過利物浦嘅羅拔圖費明奴、前曼城翼鋒馬列斯、前車路士門將艾度亞文迪。