咩玩法？車仔開新約綁實「敗家仔」9年

車路士前鋒尼高拉斯積遜射門把握力低，經常浪費入波機會，但仍然獲球會開出新合約，根據「轉會權威」記者羅曼諾(Fabrizio Romano)爆料，車路士已決定同呢位23歲塞內加爾國腳續約至2033年。

尼高拉斯積遜上年夏天以3,200萬鎊(約3.27億港元)轉會費，由維拉利爾加盟車路士，當時已簽下8年長約至2031年，佢上季英超上陣35場入14球，經常失機而備受批評。

不過，積遜今季踢3場英超已入2球，表現有改善，車仔亦決定同佢延長合約至2033年，最大原因可能同「財技」有盟，會方想用超長合約攤分轉會費，整靚盤數。

車路士上月亦同中場高爾彭馬續約至2033年，當時唔少網民嘲諷佢簽咗「賣身契」、「坐9年監」，尼高拉斯積遜今次成為另一位「入獄」球員。