愛華頓計劃換帥　莫耶斯願意回歸

愛華頓今季英超3戰全敗後，《Football Insider》指會方計劃炒領隊戴治，並可能聘請莫耶斯接手執教，消息人士指呢位61歲蘇格蘭名帥已經同意回巢領軍。

愛華頓過去3季都係驚險護級成功，今季開鑼3連敗，情況更加惡劣，甚至有外國博彩公司已提早向買咗「愛華頓降班」人士派彩。「拖肥糖」管理層必須盡快行動拯救球隊，換帥係最簡單直接方法，並睇中昔日「功勳主帥」莫耶斯。

莫耶斯曾於2002至13年執教愛華頓長達11年，其後轉投曼聯，佢近年執教韋斯咸，取得不俗成績，包括奪得2022/23年球季歐協聯冠軍，上季結束後約滿離隊，現時冇教職在身，可以隨時上任。

消息人士指莫耶斯非常樂意第2度執教愛華頓，畢竟佢對「拖肥糖」有1份深厚感情。