葡萄牙力捧17歲超新星　見到C朗會怕醜！

葡萄牙歐國盃失意後再度出擊，39歲嘅C朗拿度繼續入選國家隊，不過領隊馬天尼斯亦開始為未來準備，今次歐國聯大軍就召入17歲前鋒昆達，呢位士砵亭新星上個月先至升上一隊，極速入選埋葡萄牙國家隊，難怪見到殿堂級C朗會變成「怕醜仔」！

昆達今季被提拔上士砵亭一隊，上月葡超盃首演對波圖即刻入波，據報曼城球探都有入場，而且被佢嘅能力迷倒，將會列入曼城未來收購名單當中。昆達今季4場聯賽全部正選上陣，被視為國家隊明日之星。

C朗日前更爆出同昆達一則「趣聞」：「早排有次返房，見到新入國家隊嘅昆達，我問佢比賽完恢復未？我見到佢個樣好怕醜、好尷尬，好多新人都會怕醜唔敢同我講嘢，我唔會話自己係爸爸角式，更加似係佢哋嘅大哥哥。」