海倫復操進度良好　有望復出鬥修咸頓

曼聯前鋒海倫自從季前熱身賽對阿仙奴一役受傷之後，一直未有上陣，呢位21歲丹麥國腳近日復操進度良好，並暗示已準備再次上陣，有望等國際賽期結束後，9月14日晚英超復出作客對修咸頓。

海倫近日喺體能教練及軍醫指導之下，進行單獨訓練，傷勢已經冇大礙，佢喺社交網上話：「一點一點準備好超音速起飛。」似乎急不及待想復出。

雖然曼聯新簽前鋒約舒亞舒克斯首場對富咸，立即入波，但近2場都食白果，上場對利物浦更加浪費2次入波黃金機會，令球迷更加懷念海倫，如果佢可以趕及復出鬥修咸頓，對於曼聯絕對係一場及時雨。