AEK雅典出破紀錄人工　馬迪爾有望希臘落班

今夏同曼聯約滿離隊嘅安東尼馬迪爾，據報獲希臘勁旅AEK雅典垂青，對方開出球會史上最高人工斟介，呢位法國射手有望去希臘落班。

28歲嘅馬迪爾人工高兼傷患多，令唔少大球會放棄，雖然多數聯賽嘅轉會窗已關閉，不過自由身嘅佢就唔受限制，《Sport24》報道AEK雅典已向馬迪爾開出聘約，人工將超過同樣係新加盟嘅前熱刺球星拉美拿，成為AEK雅典史上最高薪球員。

雖然報道未有透露實際金額，不過阿根廷翼鋒拉美拿7月份加盟嗰陣，年薪達到210萬鎊。馬迪爾喺選擇唔多情況下，好大機會答應AEK雅典嘅聘約。