摩連奴出手打救　費倫巴治擬借用安東尼

英超嘅夏天轉會窗已經關閉，不過土耳其等聯賽仍然可以買人，據報曼聯雙星卡斯米路同安東尼馬菲奧斯都成為土超球會目標，由摩連奴執教嘅費倫巴治，已向曼聯提出借用巴西翼鋒安東尼。

2年前以1億歐元天價加盟曼聯嘅安東尼，表現低沉而且愈踢愈差，上季聯賽只得1入波1助攻，今季更被新人阿密特迪亞路「爬頭」，又有新兵約舒亞舒克斯爭位，安東尼今季暫時只係踢咗1分鐘。

據《Sport Witness》報道，費倫巴治向曼聯提出借用1季，以安東尼20萬鎊周薪人工，長坐冷板對曼聯亦唔係好事，令交易有望達成。據報加拉塔沙雷亦提出借用卡斯米路，但呢位巴西防中已作出拒絕。