奧森漢去土超玩半季？10球會有「特權」搶人

拿玻里前鋒域陀奧森漢夏天慘變「賣剩蔗」，歐洲主要聯賽轉會窗完結後，先至臨急臨忙以借用身份加盟加拉塔沙雷。不過據土耳其媒體報道，域陀奧森漢喺土超可能只玩半季，因為佢合約內加入特別條款，如果有指定嘅10間球會提出收購，佢可以隨時走人。

土耳其媒體《A Spor》爆料，1年前仲係當紅炸子雞嘅域陀奧森漢，唔會甘心長期留喺土耳其，所以佢簽約加拉塔沙雷前，特別要求加入離隊條款，指定10間球會提出收購嘅話，佢可以隨時轉會。雖然邊10間球會「上榜」未有公開，但著名記者Kagan Dursun就指拜仁慕尼黑、阿仙奴、車路士同利物浦係其中4間，意大利媒體就指皇家馬德里同巴黎聖日耳門係另外2間。

除此之外，域陀奧森漢仲同拿玻里傾掂數，將合約內原本1.09億鎊買斷條款，大幅降低至6,300萬鎊，雖然對多數球會嚟講仍然係天文數字，但如果佢可以喺土超踢番前季做意甲神射手嘅巔峰水平，相信仍會有唔少捧場客。