高處未算高！玻利維亞更換主場更恐怖

玻利維亞喺今屆世界外南美洲區成績低落，6場比賽只得1勝5負，以往靠高原主場搶分嘅優勢亦不復見。不過「高處未算高」，玻利維亞新帥更換主場嘅申請最近獲批，嚟緊主場會搬去海拔更高嘅城市埃爾阿爾托舉行。

玻利維亞主場一向喺首都拉巴斯，呢度海拔高達3,640米，作客球員喺唔習慣高原氣候下，好快就會踢到冇晒氣，但近期優勢消失，對上5場世盃外主場1勝4負，新帥維利加斯就要求將主場，由拉巴斯轉去埃爾阿爾托，呢個球場海拔足足去到4,150米！

維利加斯表示：「勝負由細節決定，轉球場唔代表一定贏，但可以製造更有效嘅爭勝條件，我哋知道喺埃爾阿爾托係難以被擊倒。」玻利維亞陣中有6人嚟自埃爾阿爾托球會阿爾韋斯列迪，呢支勁旅今年7場自由盃同南球盃主場賽事全勝，玻利維亞周五(6日)凌晨就會喺呢個球場對委內瑞拉。