拉菲爾美亞獲保釋　性侵案內情曝光

華倫西亞前鋒拉菲爾美亞喺周二(3日)，因涉嫌強姦兩名女子而被警方拘捕，呢位27歲球星周四(5日)獲准保釋，但護照要被扣留。拉菲爾美亞重獲自由後大方受訪，表示將會公開交代事件。

西班牙媒體《Las Provincias》透露案發細節，提出指控嘅兩名21歲及25歲女子，據報喺夜店同拉菲爾美亞以及另一男子相識後，同意去拉菲爾美亞屋企繼續開P，期間拉菲爾美亞同其中一名女子「攬攬錫錫」，當想有進一步行動後被女方拒絕，但拉菲爾美亞就喺泳池旁邊霸王硬上弓。

警方調查期間，拉菲爾美亞獲准保釋，並會重投華倫西亞操練，呢位前西班牙U23國腳獲釋後，向《La Sexta》表示：「我依家好好，到我講嘢嘅時間我就會講嘢，向大家交代唔係問題。」