英格蘭「雙舒」大預測　坦哈格幾時炒魷？

曼聯上季英超拎第8位創球會史上新低，今夏雖然大事招兵，不過新球季3戰2負繼續令人失望，英格蘭兩大傳奇前鋒舒利亞同舒寧咸，近日不約而同「睇死」領隊坦哈格教唔長。

昔日曼聯「三冠王」功臣舒寧咸表示：「排第8肯定係唔好，上季唔穩定嘅表現，但依家仍然繼續，我睇唔到球隊有乜改變。或者有唔多嘅球員，但坦哈格嘅哲學並冇改變，我唔想見到人被炒魷，但坦哈格確實未夠班教曼聯。我唔覺得坦哈格會教曼聯到季尾，可能聖誕節就會被炒。」

另一英格蘭傳奇前鋒舒利亞就更悲觀，話未來2場波就會決定坦哈格生死：「如果坦哈格想安全過聖誕，未來2場波係關鍵，如果成績冇大幅提升，外面嘅壓力同聲音將會難以承受。」曼聯未來2場聯賽，分別要作客修咸頓同水晶宮。