等足20年！聖馬力諾終贏波　仲係同一對手

著名嘅「魚腩球隊」聖馬力諾，周五(6日)凌晨歐國聯D1組迎接歷史性一役，呢支長年世界排名墊底嘅球隊，主場1比0擊敗列支敦士登，係佢哋相隔20年後首次贏波，更加上國家史上首場正式國際賽勝仗，完場後全國瘋狂慶祝。

聖馬力諾喺1990年首次參加正式比賽，今場歷史性勝利前，只係喺2004年熱身賽試過1比0贏列支敦士登，經歷20年同140場比賽不勝後，今仗佢哋對番同一個手下敗將，憑19歲中場辛素利喺53分鐘攻入全場唯一入球，拎到聖馬力諾首場正式國際賽勝仗。

入球英雄辛素利喺意大利第4級聯賽效力，聖馬力諾上次贏波嗰陣佢仲未出世，辛素利賽後表示：「我唔知聖馬力諾上次贏波係點，但能夠喺家人同主場球迷面前入波兼贏波，呢一刻係無價，拎到首場勝仗後，我哋要相信自己下場都可以贏波。」