艾華利斯1射1傳　阿根廷冇美斯照炒智利

周五(6日)朝早世盃外南美洲區賽事，阿根廷喺美斯受傷缺陣下，繼續展現強大火力，憑祖利安艾華利斯1射1傳，主場以3比0大勝智利，7戰6勝喺榜首遙遙領先。

阿根廷上半場同智利悶和0比0，不過換邊後3分鐘就由阿歷斯麥亞里士打接應艾華利斯傳送先開紀錄，呢位馬德里體育會前鋒84分鐘禁區外射成2比0。補時階段，後備上陣嘅保羅戴巴拿窄角度射入埋齋，助阿根廷大勝3比0。

同日另一場世盃外南美洲區，玻利維亞搬去海拔4,150米嘅埃爾阿爾托做主場後，果然重拾「魔鬼主場」威力，4比0大破委內瑞拉。