殺雞焉用牛刀！車路士歐戰名單冇高爾彭馬

英超豪門車路士陣容星光熠熠，甚至出現人滿之患，球隊周四(5日)公布歐協聯25人大軍名單，就作出驚人決定，王牌球星高爾彭馬同韋斯利科芬拿、羅美奧拉維亞都被踢走，唔使勞煩佢哋踢分組賽嘅「例行公事」。

車路士以超豪華陣容踢歐協聯，實力大超班，分組賽對手只係根特、彭拿典奈高斯、海登咸，同埋嚟自亞美尼亞、哈薩克同愛爾蘭嘅球隊，所以領隊馬利斯卡決定唔使出盡全力，畀韋斯利科芬拿、羅美奧拉維亞兩位曾經大傷嘅球員，以及靈魂人物高爾彭馬免役。

車路士今季要踢英超、英足盃、英聯盃、歐協聯同埋明年夏天嘅全新世冠盃，有可能要踢80場比賽，所以領隊馬利斯卡亦要考慮球員嘅負擔。如果車路士順利出線，去到歐協聯淘汰賽前可以再作3個名單調整，高爾彭馬到時先註冊都未遲。