曼城雙星命運大不同　迪布尼起孖夏蘭特啞火

周六(7日)凌晨歐國聯，曼城雙星奇雲迪布尼、艾寧夏蘭特各自為國出征，命運大不同，奇雲迪布尼梅開二度，協助比利時喺A2組主場以3比1擊敗以色列。反觀艾寧夏蘭特啞火，踢足全場都冇波入，挪威作客大熱倒灶，只能打和哈薩克0比0。

比利時今仗佔上風，開賽21分鐘兩位曼城球員合作，謝利美杜古傳畀奇雲迪布尼射入。雖然之後卡斯泰尼擺烏龍，導致被以色列扳平，但換邊後，泰利文斯勁射入網，再次為比利時領先，加上奧賓達博到12碼，奇雲迪布尼主射入網，奠定3比1勝局。

值得一提，奧賓達今仗除咗博到12碼之外，並貢獻1次助攻，表現大勇，完全可以取代冇份入選嘅射手盧卡古。

至於B3組，艾寧夏蘭特冇咗曼城隊友奇雲迪布尼支援，表現大打折扣，即使挪威佔盡優勢，有19次射門，但只有2次中目標，夏蘭特踢足全場都冇波入，最終同哈薩克打和0比0，連1.26倍客W都開唔出。