蘇亞雷斯國家隊告別戰　中柱食白果

周六(7日)早上世界盃外圍賽南美洲區，賽前已表明今仗最後1次為烏拉圭上陣嘅傳奇前鋒蘇亞雷斯，雖然以正選身份踢足全場，可惜射門中柱冇波入，仲被罰1張黃牌，最終主場打和巴拉圭0比0，未能贏波告別國際賽舞台。

現年37歲嘅蘇亞雷斯近年已逐漸淡出國家隊，今場正式成為佢嘅告別戰，球場內掛出多幅讚揚「哨牙蘇」嘅橫額，家人亦有撐場。科蘭、盧根奴、高甸等烏拉圭名宿，以至前烏拉圭主帥泰巴尼斯都有入場支持蘇亞雷斯。

烏拉圭領隊比爾沙好識做，安排蘇亞雷斯擔任正選，並畀佢踢足全場，無奈「哨牙蘇」腳風唔順，包括迎頂角球高出，半車身抽射中柱彈出，巴拉圭亦有中場祖利奧安斯素遠射中柱唔入。

戰至比賽末段，蘇亞雷斯可能太想入波幫球隊勝出，同對手發生爭吵，被球證出示黃牌，成為告別戰污點。「哨牙蘇」正式結束17年國家隊生涯，累積上陣143次，僅次於161次嘅高甸，並以69球屬於烏拉圭國家隊史上最多入波球員。

雖然烏拉圭今仗和波失分，但仍然排南美洲區第2位，出線機會樂觀。