苏亚雷斯国家队告别战　中柱食白果

周六(7日)早上世界杯外围赛南美洲区，赛前已表明今仗最后1次为乌拉圭上阵嘅传奇前锋苏亚雷斯，虽然以正选身份踢足全场，可惜射门中柱冇波入，仲被罚1张黄牌，最终主场打和巴拉圭0比0，未能赢波告别国际赛舞台。

现年37岁嘅苏亚雷斯近年已逐渐淡出国家队，今场正式成为佢嘅告别战，球场内挂出多幅赞扬“哨牙苏”嘅横额，家人亦有撑场。科兰、卢根奴、高甸等乌拉圭名宿，以至前乌拉圭主帅泰巴尼斯都有入场支持苏亚雷斯。

乌拉圭领队比尔沙好识做，安排苏亚雷斯担任正选，并畀佢踢足全场，无奈“哨牙苏”脚风唔顺，包括迎顶角球高出，半车身抽射中柱弹出，巴拉圭亦有中场祖利奥安斯素远射中柱唔入。

战至比赛末段，苏亚雷斯可能太想入波帮球队胜出，同对手发生争吵，被球证出示黄牌，成为告别战污点。“哨牙苏”正式结束17年国家队生涯，累积上阵143次，仅次于161次嘅高甸，并以69球属于乌拉圭国家队史上最多入波球员。

虽然乌拉圭今仗和波失分，但仍然排南美洲区第2位，出线机会乐观。