轉戰南美　迪比同意加盟哥連泰斯

荷蘭前鋒迪比今夏離開馬德里體育會之後，仍然未有班落，現時好大機會轉戰南美球壇，根據「轉會權威」記者羅曼諾(Fabrizio Romano)爆料，呢位30歲射手已經同巴甲球會哥連泰斯達成口頭協議，雙方將會簽約2年。

迪比上季為馬體會各項賽事上陣31場入9球，由於呢支西甲勁旅決定重組鋒線，拒絕同迪比續約，畀佢自由身離隊。雖然早前傳出另外2支西球隊西維爾、華歷簡奴有興趣簽入迪比，但原來哥連泰斯先至係真命天子。雙方已經傾掂合約待遇，只欠正式簽約，就會成事，預料未來幾日會有定案。

雖然傳統上甚少歐洲球員去南美洲搵食，但近年情況有變，哥連泰斯上月簽入西班牙前鋒希達靴南迪斯，現時加埋迪比，會方似乎有意打造一條歐洲鋒線。