皇馬大地震　安察洛堤考慮提早離任

上季西甲及歐聯「雙冠王」皇馬今季失準，踢4場聯賽只有2勝2和，根據西班牙傳媒爆料，「銀河艦隊」教練安察洛堤考慮提早明夏離任，並可能去沙特阿拉伯「掘金」。

安察洛堤上年11月拒絕巴西足總邀請執教國家隊，並同皇馬續約至2026年夏天，根據合約，呢位65歲意大利名帥可以選擇明夏提早離隊。

雖然「肥安」曾經表示，只要皇馬唔炒佢，就會一直留任，但眾所周知，皇馬會長皮里茲一向要求極高，如果球隊今季失冠，恐怕就算安察洛堤自己唔走，都可能被炒魷。加上傳出已有沙特豪門向「肥安」開出天價合約，令佢開始心動。

至於皇馬亦有接替安察洛堤嘅人選，就係利華古遜教練沙比阿朗素，呢位42歲西班牙少帥球員生涯曾效力皇馬5年，佢有意回巢，雙方有望一拍即合。