卡斯利拒絕徵召格連活特　牙買加等緊佢

英格蘭換帥，遭排除出國家隊嘅格連活特係咪有轉機？答案係否定，三獅看守領隊卡斯利明確表示，唔會考慮格連活特，牙買加係該馬賽前鋒另一選項。

格連活特今夏轉投馬賽，3場法甲交出5入球1助攻，獲當地球迷認可，但由於佢個底花晒，重返英格蘭國家隊仍然遙遙無期，卡斯利回覆記者查詢時明確表示：「佢不在考慮之列，我知道佢近期表現如何，但仍不被納入考慮。」

格連活特曾於2020年9月入選英格蘭1次，在熱身賽對冰島上陣，不過該次比賽期間佢聯同菲爾科頓帶兩名女模兒返酒店，違反防疫規定而被雙雙踢出國家隊，後來菲爾科頓獲原諒，但格連活特自此未再入選，後來格連活特再爆出家暴及性侵女友醜聞，雖然其後獲撤銷控罪，但其行為不被社會人士接納，甚至無法再為曼聯上陣而被外借及出售。

牙買加足總早前提出，讓格連活特轉籍代表牙買加，雖然格連活特當時拒絕轉籍，寧願等待英格蘭徵召，但卡斯利已表明唔會考慮佢，格連活特又可以重新考慮踢牙買加呢個選項。