C朗效應消失　艾納斯今季入座率僅22%

葡萄牙巨星C朗2023年1月加盟沙特阿拉伯豪門艾納斯，曾經震驚全球，掀起中東「足球風暴」，令艾納斯球迷大增。不過，呢股熱潮已經大為消退，根據英國《鏡報》報道，艾納斯今季2場聯賽平均入座率僅22%，出現大量空位，情況令人尷尬。

沙特各大球會近年紛紛簽入球星，都係想提升聯賽知名度及入座率，但「星戰效應」作用愈來愈低。艾納斯今季入座率更加令人慘不忍睹，首仗主場原本可容納25,000人，但只有8,951人入場。

至於第2場作客球場有34,000個座位，結果得4,195人入場，換言之，兩場球場總容量為59,000座位，但合共只有13,146人入場，平均入座率僅22%。

另外，艾納斯宣布同後衞基斯蘭高蘭解約，繼早前阿歷士迪尼斯轉投保地花高後，再有1位外援離隊。