高普再次執教多蒙特？真相原來係咁

高普上季結束後離開利物浦，曾暗示可能退休，但呢位57歲德國名帥周六(7日)現身多蒙特主場，領軍比賽，原來係多蒙特為2位退役名將比薛斯基、巴拉斯塞高斯基補辦「告別賽」，搵來高普客串執教。

高普曾於2008至15年執教多蒙特，捧過2次德甲及1次德國盃冠軍，並打入2013年歐聯決賽，2位波蘭名將比薛斯基、巴拉斯塞高斯基，正係當年「高普王朝」主力，2人已離開多蒙特多時，會方依家為佢哋補辦告別賽，由「比薛斯基朋友隊」對「巴拉斯塞高斯基隊」。當然要請埋高普做主帥，重溫光輝歲月，高普今次擔任「巴拉斯塞高斯基朋友隊」教練。

高普深受多蒙特球迷愛戴，獲得熱烈歡迎，反而成為今場主角。另外，今夏自由身離開多蒙特嘅中堅曉姆斯亦有現身，同球迷告別。