泰希宣布下季鐵定離隊　免費轉會拜仁？

德國中堅莊拿芬泰希同利華古遜只剩1年合約，夏天轉會拜仁慕尼黑失敗後，呢位28歲球星周六(7日)宣布鐵定下季約滿離隊，好大機會以自由身加盟拜仁慕尼黑。

正為德國出戰歐國聯嘅泰希，接受《SZ》訪問嗰陣表態：「我唔會續約(利華古遜)，呢個決定同之前一樣咁清晰，係出於職業考慮，約滿之前我會為利華古遜付出100%。我喺利華古遜9年，歷盡高低起跌，上季幾乎係完美嘅一季，球員生命短暫，所以我想開發更多可能性。」

拜仁慕尼黑今個夏天一直追求佢嘅加盟，明年好大機會以自由身轉會，泰希對此就不置可否：「呢係好問題，即管睇下點，我依家唔諗咁遠，同利華古遜仲有一季要踢，而且除咗拜仁，夏天我仲收到其他球會聘約。」