曼聯球員國際賽大勇　周末英超王者再臨

曼聯遭遇英超2連敗，士氣難免受打擊，幸好一眾球員迅速振作，並喺近日國際賽有好表現，為嚟緊周六(14日)晚英超作客修咸頓，打下一支強心針。

曼聯前鋒約舒亞舒克斯上場歐國聯射入1球及1次助攻，協助荷蘭大勝波斯尼亞5比2。至於般奴費南迪斯助攻另1位紅魔鬼球員達洛治入波，幫葡萄牙以2比1擊敗克羅地亞。

此外，中堅哈利馬古尼、中場明奈亦喺英格蘭對愛爾蘭交足功課，哈利馬古尼4次爭頂都勝出，盡顯空中霸王本色。明奈踢77分鐘有86次觸球，3次嘗試扭過對手，有2次成功。

新加盟嘅烏拉圭國腳文路爾烏加迪雖然今季未踢過球會賽事，但日前喺世界盃外圍賽對巴拉圭，展現不俗狀態，正選上陣踢咗79分鐘，12次長傳有8次成功交畀隊友，12次對抗有9次勝出，4次爭頂3次勝出，並有3次解圍及5次搶截成功。

曼聯主帥坦哈格現時最希望一眾球員可以將踢國家隊嘅出色表現，延續至球會賽事。