夏蘭特將加薪續約　但有一大分歧未解決

根據西班牙《馬卡報》爆料，曼城射手艾寧夏蘭特已展開續約談判，預料將獲得大幅加薪，超越隊友奇雲迪布尼，成為英超「打工皇帝」。不過，雙方仍存在一大分歧，曼城方面希望廢除毀約金條款，以免遭其他球會買斷佢，但夏蘭特唔同意，似乎有「異心」。

艾寧夏蘭特仲有3年合約在身，曼城管理層已經急不及待同佢展開續約談判，大幅加薪在所難免。據悉奇雲迪布尼現時固定周薪為42.5萬鎊(約435萬港元)，艾寧夏蘭特有37.5萬鎊，相信呢位24歲挪威國腳續約後，人工將會超越奇雲迪布尼，而且仲未計其他獎金。

曼城唔介意向夏蘭特提供天價合約，惟一條件係廢除現有毀約金條款，防止被皇馬等大球會直接買斷佢。夏蘭特當年效力多蒙特，合約有5,100萬鎊毀約金條款，曼城先至可以平價收購佢，「藍月亮」當然深知箇中隱憂。

不過，夏蘭特團隊堅持要有毀約金條款，將來決定去留有多一項選擇，至於雙方最後會否一人讓一步，仍然有待磋商。