麥巴比「場外決戰」　將踩入PSG追討欠薪

基利安麥巴比近日返回法國，除咗為國家隊出戰歐國聯之外，仲有一項「重要工作」，佢將率領法律團隊喺當地時間周三(11日)同巴黎聖日耳門(PSG)高層，展開談判，追討5,500萬歐元(約4.76億港元)欠薪。

基利安麥巴比上季宣布唔同PSG續約，並於今夏自由身轉投皇馬，令呢間法甲豪門「人財兩失」，PSG班主艾卡理化盛怒之下作出報復，拒絕向呢位25歲前鋒發放最後2個月薪酬、忠誠金及部分簽字費，總共5,500萬歐元。

麥巴比早於6月已經透過律師向PSG追討欠薪，但對方不予理會，佢上月將PSG告上法甲賽會、法國足總、歐洲足協，希望3大機構向PSG施壓，拎番血汗錢，但仍然未有重大進展。

因此，麥巴比今次決定親自上陣同PSG管理層談判，法甲賽會嘅法律委員會代表都會加入，被形容係一場「世紀法律大戰」，隨時精彩過歐國聯比賽。