【有片】39歲生日大禮！莫迪歷神級罰球致勝
2024年09月09日 09:00
東網電視
更多新聞短片
莫迪歷寶刀未老。
39歲老將C朗拿度喺國際賽繼續發光發熱，另一位「長青樹」莫迪歷同樣寫下傳奇一頁。周一(9日)凌晨歐國聯A1組，克羅地亞憑莫迪歷精彩罰球一箭定江山，主場1比0擊敗波蘭。呢位皇家馬德里球星賽後迎嚟39歲生日，但堅持仍未有退役打算。
克羅地亞首戰輸畀葡萄牙，今仗迎戰波蘭雖然控制大戰，但一直搵唔到入波方法，直到52分鐘克羅地亞喺禁區頂獲得罰球，當時仲有幾個鐘頭就39歲生日嘅莫迪歷主射，個波彎過人牆直飛死角，「格仔兵團」就靠呢個入波贏1比0。
莫迪歷今場第180次為克羅地亞披甲，追平西班牙嘅沙治奧拉莫斯，僅次於C朗成為歐洲史上第2多國際賽上陣球員，佢賽後表示：「我唔會諗未來，當有一日我覺得心入面團火熄滅，我就會退休，呢點只有我自己先會知道，踢得一場得一場！」