西班牙10人應戰照炒瑞士　祖斯盧成效率王

歐國盃盟主西班牙重現霸氣！周一(9日)凌晨歐國聯A4組賽事，「狂牛兵團」作客瑞士，20分鐘就有中堅拿洛文特被逐，但大部份時間10人應戰下，仍然以4比1大勝而回，喺卡塔爾落班嘅祖斯盧辛馬田有入波，賽後獲領隊富安迪點名大讚。

西班牙上仗被塞爾維亞悶和0比0，今場改派老將祖斯盧掛帥，佢喺4分鐘就接應拉明耶馬助攻先開紀錄，13分鐘法比安彭拿增添紀錄，雖然中堅拿洛文特喺20分鐘被逐，並喺完半場前被瑞士追番1球，但西班牙下半場重整旗鼓，踢少個下再由法比安彭拿同費倫托利斯入波，大勝4比1完場。

34歲嘅祖斯盧夏天由皇家馬德里轉投卡塔爾勁旅艾加拉法，但喺西班牙仍然交足貨，歷來為西班牙喺正式國際賽上陣482分鐘，交出6個入波同3次助攻，平均每53.5分鐘就有入球貢獻。領隊富安迪賽後大讚：「我好欣賞祖斯盧，無論佢有冇得落場，都會做好榜樣，今場做好我所有要求，當一個球員有咁嘅態度，無論去邊個聯賽都唔會失敗。」