輸開有條路！坦哈格帶隊踢紀念賽都係輸

曼聯領隊坦哈格今季運氣麻麻，由熱身賽輸畀利物浦開始，到社區盾射輸12碼畀曼城，之後英超開咧3場1勝2負，估唔到喺國際賽休戰期，一樣難逃輸波命運。坦哈格周日(8日)返荷蘭客串執教烏德勒支傳奇隊踢紀念賽，最終輸波收場。

呢場紀念賽係慶祝效力烏德勒支15年嘅雲達馬維爾榮休，曾經踢過同教過烏德勒支嘅坦哈格，亦教過雲達馬維爾2季，所以答應執教烏德勒支傳奇隊。最終傳奇隊喺比賽尾段憑雲達馬維爾「破蛋」，1比2輸畀烏德勒支現役球員隊。

坦哈格當然唔會介意紀念賽輸波，佢賽後表示：「一個球員可以效力同一間球會咁長時間，絕對係個傳奇，佢值得擁有呢個盛典。」坦哈格依家要專心備戰周六(14日)作客修咸頓，希望避免英超3連敗。