卡拉科利退隊　提前返阿仙奴養傷

意大利足總周日(9日)宣布，上場受傷嘅中堅卡拉科利提前退隊，唔會參加周二(10日)凌晨作客以色列嘅歐國聯賽事，呢位22歲新星已返去阿仙奴療傷，但周日(15日)北倫敦打吡作客熱刺上陣成疑。

卡拉科利喺上仗對法國正選上陣，踢到71分鐘被奧士文尼迪比利意外踢傷，要即時退下火線，領隊史巴列堤原本話預期佢可以趕得切上陣對以色列，不過最終都係提前離隊，意味傷勢比想像中嚴重。

意大利傳媒指出，卡拉科利離隊係「預防性質」，應該唔會係大傷，但距離北倫敦打吡唔夠1星期，可唔可以復出成為疑問。阿仙奴目前有唔少傷兵，富安健洋、基蘭泰亞尼、米基爾馬連奴同加比爾捷西斯都養緊傷，中場迪格蘭賴斯就要停賽。