英格蘭秘密武器　創造力勁過彭馬、科頓！

英格蘭喺看守領隊卡斯利帶領下，唔少年輕球員都有機會出頭，24歲中場基比斯韋特上場處子上陣，獲得唔錯嘅評價。原來呢位諾定咸森林球星，過去3季英超創造機會次數，更勝菲爾科頓、占士麥迪臣同高爾彭馬等天才球員，難怪卡斯利對佢推崇備致。

基比斯韋特係卡斯利執教英格蘭U21嘅愛將，雖然佢效力弱旅森林，不過表現相當突出，統計顯示佢過去3季英超，生波創造機會111次，喺英格蘭球員當中僅次於布卡約沙卡(134次)，多過菲爾科頓(102次)、占士麥迪臣(95次)、阿歷山大阿諾特(87次)等球星。

基比斯韋特亦表明支持卡斯利長教英格蘭：「我覺得佢比之前(教U21)更加認真，呢個係好事，亦證明佢真係想一直執教英格蘭，希望我哋可以一直用佢嘅足球理念前進。」英格蘭今次陣容缺少菲爾科頓、高爾彭馬同祖迪比寧咸等中場，基比斯韋特如果要保住國家隊席位，周三(11日)對芬蘭就要把握機會爭取表現。