曼城夏蘭特續約談判　重點唔係人工

曼城今夏放走祖利安艾華利斯，表示打算長留艾寧夏蘭特，雖然雙方尚有3年合約，但「藍月亮」已經急住同夏蘭特簽新約，人工將會超越奇雲迪布尼，不過夏蘭特要求加入解約條款，成為談判重點。

《馬卡報》報道，皇馬同巴塞特別關注夏蘭特合約情況，因為皇馬簽入基利安麥巴比後，下個目標就係夏蘭特，至於巴塞亦希望拉攏夏蘭特加盟，同皇馬嘅「麥總」打對台，夏蘭特曾表示自己生涯要打遍五大聯賽，依家已完成德甲同英超版圖，下一站可能係西甲，因此有傳言佢要求曼城加入解約條款，以方便日後同西甲雙雄接觸。

曼城現階段最想做嘅，就係用長約綁實夏蘭特，據報新約條件係夏蘭特人工將超越迪布尼，成為隊內第一高薪，年薪達到稅後2,400萬歐元(約2億港元)，周薪40萬鎊，不過最重要嘅解約條款仍未有結論。