意大利又靠法迪斯贏波　史帥預留基艾沙位置

夏天歐國盃表現不濟嘅意大利，喺歐國聯有翻生迹象，周二(10日)凌晨A2組作客2比1贏以色列，小組2戰全勝高踞榜首。國際米蘭中場大衞法迪斯今場又有入波，成為史巴列堤上任以來No.1入球王。

史巴列堤今場正選陣容，有5人都係「00後」小將，表現相當唔錯，38分鐘由大衞法迪斯先開紀錄，呢球係佢喺史巴列堤麾下第6個國際賽入球，係同期最多入球球員，其餘意大利國腳最多只係入2球。

摩斯堅恩62分鐘為意大利拉開比數，尾段雖然被以色列破蛋，但無阻意大利贏2比1，喺A2組兩戰全取6分排榜首。

史巴列堤嘅3-5-2陣式效果理想，但呢套戰術未有適合利物浦前鋒費達歷高基艾沙嘅位置，不過史帥就話：「呢套戰術有好多變化，基艾沙可以踢輔鋒，或者游走去邊路嘅前鋒，唔一定要係兩個中鋒。」