【官宣】迪比投哥连泰斯　朗奴高文又有嘢讲

荷兰球星迪比今夏同马德里体育会约满后，一直未有落班，周一(9日)终于宣布离开欧洲球坛，转战巴甲签约哥连泰斯2年。早前极力反对贝云积去沙特落班嘅荷兰领队朗奴高文，就对今次转会“开绿灯”，唔排除会再召迪比入国家队。

30岁嘅迪比一直系荷兰主力，周一飞抵巴西同哥连泰斯签约至2026年夏天，据报2年合约总值1,100万欧元，当中900万欧元会由哥连泰斯嘅赞助商承包，令佢成为全队最高薪球员。

另一荷兰国脚贝云积早前转战沙特，被朗奴高文炮轰为钱弃前途，国家队“永不录用”；今次迪比去巴甲，朗奴高文亦有嘢讲：“我反对贝云积去沙特，但迪比唔同，巴甲嘅水平更高，所以我冇问题，迪比仍然有机会入选国家队，前提系佢踢出自己嘅状态同水平。”