皮爾斯摩根再為C朗開火：坦哈格係個白痴！

C朗拿度近日喺歐國聯連環入波，生涯入球突破900大關，作為佢老友嘅英國名嘴皮爾斯摩根亦相當安慰，日前再為C朗出頭，怒轟曼聯領隊坦哈格係個「白痴」，直指唔識得點樣用世界級球員。

皮爾斯摩根喺《talkSPORT》節目內發炮：「坦哈格係個白痴！好抱歉，但佢真係一個廢話連篇嘅白痴，最近又講啲咩哈利波特，坦哈格就好似一個專制嘅學校體育老師，完全唔識教天才學生。你睇下坦哈格喺曼聯搞唔掂嘅球員，C朗、查頓辛祖、拉舒福特，全部都係頂級球員。坦哈格只係識教二線球員，所以佢只能夠喺阿積士搵人返嚟。」

C朗喺國家隊入球不斷，皮爾斯摩根表示：「如果C朗仲喺曼聯，佢勁過晒球隊依家所有前鋒，佢係足球最偉大球員，所以依家向住生涯1,000個入球進發，連堅尼最近都話C朗仍然係當今最佳嘅入球者。」