曼聯鬥聖人難夫添　海倫蒙特未出得

英超周六重開，早場就有曼聯作客「聖人」修咸頓，英國傳媒更新曼聯傷兵情況，前鋒海倫同中場美臣蒙特仲未出得，勞基梳爾同域陀連迪路夫可望復出。

報道指，國際賽檔期雖暫未有為曼聯增添傷員，但本身一班「十字軍」傷勢並無大進展，其中丹麥前鋒海倫仲未得，坦哈格曾指出，佢就快傷愈，但就需要一段時間恢復狀態。傳媒估計佢要再抖一場，對修咸頓仲未得，下場聯賽對水晶宮可復出。

美臣蒙特之前對白禮頓一戰肌肉受傷，佢喺社交網留言稱：「我會缺席幾場比賽，我會努力回復體能，重新準備。」之前消息指佢休戰5周，所以近期幾場仍未出得，最快要10月先復出。

好消息係勞基梳爾同域陀連迪路夫已告傷愈，勞基梳爾康復進展理想，域陀連迪路夫只有腳趾問題，兩人對修咸頓復出機會樂觀。