【有片】迪历特又孭镬累荷兰　耻辱性半场被换

荷兰周三(11日)凌晨喺欧国联A3组，主场同德国激战踢成2比2平手，呢场波主角系效力曼联嘅中坚马菲斯迪历特，佢继上场2次犯错导致失波后，今场又喺后场“自杀式”交失波被德国追平，领队朗奴高文都顶唔顺，半场拿拿临将佢换走，连德国媒体都嘲讽佢系“荷兰版马古尼”。

荷兰上场5比2赢波斯尼亚，两个失球都系因为迪历特犯错，不过赢波就畀佢“过骨”。今场迎战实力强大嘅德国，荷兰2分钟就由雷恩达斯先开纪录，以为顺风顺水，点知38分钟迪历特后场控球，全无压力下交波竟被穆斯亚拿截到，德国2次传送就由丹尼斯乌达夫追平，迪历特拍档华基尔云迪积克嬲到拍地大闹。

迪历特“自杀式”交波累失球片段：https://twitter.com/i/status/1833592973336187351　

被打窒道气嘅荷兰，完半场前再被甘美治攻陷反输1比2，半场期间领队朗奴高文即刻揿掣，用云赫基入替荒失失嘅迪历特，荷兰稳定番落嚟，50分钟靠杜费斯入波追和2比2，最终两队打成平手。今夏被拜仁慕尼黑放弃嘅迪历特，赛后被德国媒体讽刺系“荷兰版马古尼”，撑拜仁卖得醒。

迪历特对波斯尼亚“眼神防守”片段：https://twitter.com/i/status/1832514586232201443　

朗奴高文赛后表示：“我都唔想换走迪历特，但佢依家好似每次犯错都会受到惩罚，我今场已经继续畀机会佢，换佢走系想保护佢。”华基尔云迪积克亦对拍档表现失望：“足球就系咁残酷，所以要喺失误中学习，犯错只系一瞬间，但喺呢个水平比赛就会出事。”