卡尼第100戰「起孖」　英格蘭雙蛋贈芬蘭

英格蘭喺看守領隊卡斯利帶領下，繼續有良好嘅發展，周三(11日)凌晨歐國聯B2組賽事，「三獅兵團」憑第100次為國家隊上陣嘅哈利卡尼梅開二度，主場2比0輕取芬蘭，分組賽兩戰全勝。

英格蘭今場繼續強陣，第100次上陣嘅哈利卡尼非常生猛，上半場已有頭槌入波食詐胡，56分鐘接應阿歷山大阿諾特靚傳送，推入禁區狂抽破網，呢位拜仁慕尼黑前鋒76分鐘再接應馬杜基橫傳射入，助英格蘭贏2比0。

哈利卡尼賽前獲頒「100戰金色喼帽」，佢亦帶同全家一齊出席呢項紀念儀式，哈利卡尼賽後表示：「作為一個前鋒，當然想喺呢場咁特別嘅賽事入波，射入2球兼贏波係最完美結局。」哈利卡尼100場國際賽入面，一共交出68個入波同17次助攻，今場兩個入波，亦令佢喺溫布萊球場嘅入波增加到35球，繼續刷新紀錄。