「J神」1傳1射！哥倫比亞復仇成功贏阿根廷

周三(11日)朝早世盃南美洲區外圍賽，阿根廷喺缺少美斯之下，作客1比2輸畀哥倫比亞。哥倫比亞球星占士洛迪古斯今場1傳1射，為球隊報番夏天美洲盃決賽輸波之仇，而且「J神」歷來世盃外累積13個入球，追平法卡奧成為哥倫比亞史上第1。

呢場美洲盃決賽翻版，主場出擊嘅哥倫比亞同阿根廷踢成均勢，25分鐘由「J神」助攻莫斯基拉入波領先，阿根廷48分鐘靠尼高拉斯干沙利斯追平。阿根廷之後有奧達文迪禁區內飛鏟，雖然同對手接觸輕微，但球證睇完VAR後照判12碼，「J神」操刀為哥倫比亞攻入致勝球。

哥倫比亞係今屆世盃外南美洲區唯一不敗之師，以2分落後阿根廷排第2位，至於阿根廷11場不敗走勢被終結，領隊史卡朗尼對球證執法非常不滿：「球員好努力，我哋有權贏波，如果要搵不滿嘅地方，就係嗰球12碼，加上祖利安艾華利斯上半場被踩都冇判罰，我哋只能夠硬食，因為只要我投訴一句都可能會被罰。」