尼敦阿基重創　喊住被擔架床抬走

國際賽繼續成為歐洲豪門惡夢，英超盟主曼城周三(11日)收到壞消息，荷蘭守將尼敦阿基喺歐國聯對德國一仗，上半場尾段疑似拉傷大腿，要喊住咁由擔架床抬離球場，傷勢似乎相當嚴重。

上半場尾段，尼敦阿基喺前場同對手爭波後痛苦倒地，治理期間一直表現非常痛楚，而且更流下男兒淚，最後要由擔架床抬走。荷蘭領隊朗奴高文賽後透露：「尼敦阿基似乎係有肌肉傷患，但我唔肯定。」

尼敦阿基近年經常受大腿傷患困擾，自2020年加盟曼城後，因大腿傷患而缺席嘅比賽多達30場。29歲嘅尼敦阿基季初喺曼城上陣機會唔多，3場聯賽只係後備上陣踢過2分鐘，不過隨住歐聯賽事即將展開，尼敦阿基嘅受傷將令曼城變陣空間減少。