前法國國腳涉嫌強姦被捕　落班無望！

法國傳媒報道，曾19次代表法國國家隊嘅前鋒賓耶達，涉嫌醉酒後強姦一名23歲女子而被拘捕，案件排期下個月中上庭。賓耶達夏天同摩納哥約滿後回復自由身，不過依家惹上官非，相信都冇球會敢接手。

法國《隊報》報道，一名23歲女子喺上周六(7日)，報稱被賓耶達喺車入面強姦，攜有武器嘅警察之後喺車上，將醉酒嘅賓耶達拘捕。賓耶達事後曾經短暫保釋，但案件排期10月15日開審後，警方再次將佢收押，檢控官表示：「將賓耶達收押，係唯一防止佢向受害人施壓嘅方法，而且佢有潛逃風險。」據報賓耶達喺被警方拘捕前，曾經拒絕停車嘗試逃走。

34歲嘅賓耶達踢過西維爾、摩納哥等大球會，過去12個球季都有雙位數字入球，亦係2021年法國贏歐國聯冠軍嘅成員之一，上季喺法甲亦有16個「士哥」排射手榜第5位，幫摩納哥拎到聯賽亞軍。