人氣王！奧拿拿180分鐘不失　過千球迷追星

喺曼聯演出受到質疑嘅門將奧拿拿，近日出戰非國盃外圍賽成為超級人氣王，周三(11日)凌晨為喀麥隆打和津巴布韋0比0後，離開球場嗰陣被過千球迷包圍追捧，最後連隊巴都唔可以坐，喺警察開路下先行坐車去機場，相當誇張。

喀麥隆「作客」津巴布韋嘅J組賽事，安排喺中立場烏干達舉行，而曼聯就係烏干達最受歡迎球會，據報當地一個曼聯球迷網頁就有超過60萬粉絲，所以現場大部份球迷都係幫喀麥隆打氣。當賽事結束後，奧拿拿離場嗰陣竟然有過千名球迷等候，一見奧拿拿就失控去包圍，警方就叫佢唔好上隊巴，直接坐車先行去機場。

奧拿拿被球迷包圍：https://twitter.com/i/status/1833593745083928772　

奧拿拿喺近2場英超失咗5球，不過返到國家隊就有好表現，喀麥隆上仗1比0贏納米比亞，今場再和津巴布韋0比0，奧拿拿踢足180分鐘都冇失波，都算難得。