奧迪加特揸拐杖返英　「兇手」公開道歉

阿仙奴隊長馬田奧迪加特日前喺歐國聯勇戰受傷，呢位挪威國腳周二(10日)飛返英國，被影到要拎住兩支拐杖輔助行路，傷勢似乎好嚴重，而且整傷佢嘅奧地利中場巴姆加特拿就喺社交網公開道歉。

奧迪加特喺對奧地利一戰，被巴姆加特拿飛鏟後左腳足踝扭傷，賽後佢即坐私人飛機返倫敦，但就兩手各拎拐杖，左腳未能落地，將要做磁力共振檢查傷勢，周日(15日)作客熱刺幾乎肯定唔使預佢。

「兇手」巴姆加特拿周三亦喺社交網道歉：「我喺度衷心向奧迪加特道歉，我絕對冇心傷害呢位咁出色嘅球員，希望你可以迅速康復，更強回歸！」