曼聯宣布上季蝕1.13億鎊　點解唔使罰？

曼聯周三(11日)公布23/24球季財務報告，顯示上季錄得破紀錄嘅6.618億鎊收入，但喺買人花費開支龐大下，仍然錄得1.13億鎊虧損。今個夏天曼聯仍然重金招兵，不過球會有信心可以符合英超嘅「盈利及可持續發展規例」，唔會步愛華頓同森林後塵被扣分。

曼聯自新老闆拉特克利夫接手後，正對球會內外進行改革，上年斥巨資收購美臣蒙特、奧拿拿、海倫等球星後，出現1.13億鎊虧損，連續第5個球季蝕錢。根據英超條例，任何球會喺3年期總計唔能夠出現超過1.05億鎊虧損，而曼聯過去3季總虧損高達2.574億鎊，豈不是大幅超標？

曼迷可以放心，因為「盈利及可持續發展規例」並唔係單睇帳面賺蝕，當中涉及好多會計方法，例如花費喺基建、女足、青訓嘅開支可以扣除，買人嘅轉會費亦會按合約年期「攤開」計算，相反賣人收入會全數直接入帳，所以即使曼聯今個暑假再花近2億鎊買人，仍然唔擔心會財務違規。