馬天尼斯輸波打攝影師　體記協會要求嚴懲

阿根廷周三(11日)喺世盃外圍賽輸畀哥倫比亞，門將達米安馬天尼斯完場後捲入打人風波，一名攝影師報稱被呢位阿根廷國腳襲擊，哥倫比亞體育記者協會更發公開信，要求國際足協對馬天尼斯作出處分。

報稱被打嘅攝影師叫積遜，佢表示：「馬天尼斯突然出手打我，我真係好嬲，我只係做自己嘅正作，就同佢要比賽一樣。」積遜之後更留言畀馬天尼斯：「老友你好嗎？我係積遜，即係畀你襲擊嘅攝影師，我想同你講我好好。老友，人生一定會有失敗，呢場輸波明顯對你好重要，但請你向前看。」

馬天尼斯出手影片：https://twitter.com/i/status/1833636636137058559　

根據積遜嘅「第1身」拍攝片段，當時鏡頭影住馬天尼斯，呢位效力阿士東維拉嘅球星突然一掌打向攝影機，個鏡頭就顯示跌倒地上。哥倫比亞體育記者協會發聲明表示：「馬天尼斯嘅行為係對新聞自由嘅攻擊，呢點係不能容忍，我哋要求國際足協嚴懲馬天尼斯。」

32歲嘅馬天尼斯過去捲入唔少爭議，包括喺世界盃決賽奪冠軍，出言嘲諷落敗嘅法國前鋒基利安麥巴比，又拎住冠軍獎盃放喺下體做出不雅動作，唔少球迷都批評佢贏波就風騷，輸波就發爛渣。