咁快扑錘？卡斯利即將「坐正」英格蘭領隊

英格蘭喺歐國盃決賽落敗後，修夫基結束8年領軍歲月，原本U21領隊卡斯利就暫時頂上。英格蘭嘅表現未受換帥影響，喺歐國聯2連勝後，據報英格蘭足總已屬意畀佢「坐正」，而卡斯利亦公開表示樂意接手。

英國《太陽報》報道，英格蘭原本計劃搵高普、哥迪奧拿、杜曹、樸達等名帥做領隊，不過「看守領隊」卡斯利呢2場波表現唔錯，而且受到唔少球員擁戴，所以足總屬意畀佢正式接手，雖然足總嘅物色行動仍會繼續，但卡斯利已被視為大熱人選。

50歲嘅卡斯利亦唔客氣，公開表明願意正式執教：「我可唔可以勝任？可以。我同我嘅團隊已經證明做得到，亦已為下一個國際賽期做好準備，我唔覺得英格蘭領隊係三煞位，相反係一份好好嘅工作，英格蘭唔單止擁有具競爭力球員，而係擁有可以贏冠軍嘅球員。」