38年首次！阿仙奴鬥熱刺被迫變「黑仔」

傷兵滿營嘅阿仙奴周日(15日)英超作客熱刺，未開波已經先輸一仗，英國職業裁判員公司(PGMOL)宣布，因為阿仙奴今季主場波衫「太多白色」，今仗需要改着黑色嘅作客波衫。

「北倫敦打吡」係英超盛事，紅衫嘅阿仙奴同白衫嘅熱刺，波衫顏色上一直冇衝突，不過PGMOL日前表示，阿仙奴今季件主場波衫，白色位置「過多」，為免撞色而要轉用作客波衫，亦係阿仙奴38年來首次要用作客波衫出戰「北倫敦打吡」。

另外，PGMOL宣布委任吉列執法「北倫敦打吡」，同樣令阿仙奴球迷擔心，事關「兵工廠」今季英超開咧戰對狼隊，莫斯基拉曾經向夏維斯「叉頸」，又對加比爾捷西斯「篤屁眼」，吉列通通視若無睹，反而向嬲爆還擊嘅加比爾捷西斯出示黃牌，唔知今場會唔會再對阿仙奴「不利」。