拉舒福特請專家瘋狂操練　網民：PR冇得輸！

曼聯前鋒拉舒福特冇份入選英格蘭國家隊，不過今個國際賽期都好唔得閒，社交網不斷更新佢喺健身室加操嘅影片，又做Gym又打拳非常落力。據報「福仔」仲請埋專家為佢進行特訓，希望可以重振雄風。

拉舒福特上季開始表現插水，據英國《每日星報》報道，佢喺暑假請嚟星級教練賴恩賀柏幫手訓練。30歲嘅賴恩賀柏曾經踢過曼聯青年軍，雖然足球事業麻麻，不過轉做私人教練就撈得好掂，般奴費南迪斯、達洛治、艾蘭加都係佢嘅客人。

不過，拉舒福特咁勤力加操兼擺上網分享，就有球迷質疑係「做騷」，網民留言：「拉舒福特嘅PR冇得輸」、「又話要暫別社交網，但將所有私人訓練擺上網」、「其實個個職業球員都係咁練，不過得佢會擺上網」。「福仔」今季穩坐曼聯左翼位置，但仍未取得入球。